Shillong, August 29: Asongni gipin bakrang baksa melie magape Meghalaya adokba National Sports Day-ko Shillong songjinmani U Soso Tham auditorium-o August 29 tarik-o maniangaha.
Tomanio mongsonggipa sokgipa Chief Secretary DP Wahlang aro Sports Director WAM Booth, Matsiewdor War baksa gipin daldalgipa Official-rang bakko raangaha. Dingtang dingtang kalsusaanirango gisik nange bak ragipa chadamberangko mittele adokni gipin chadamberangkoba kalsusaanio bak rana didiskachina Wahlang aganangaha.
Indake rebaenggipa jao ongnasienggipa North East Olympic Games-o bak rana antangtangko bilake tarisamsochina kupattiangaha.
Adoko dingtang dingtang sports-ni abao kalsusagipa chadamberangba tomanio bakko raangaha aro uamangoni national aro international gadango susagiparangko dingtangmancha mande rae boksisrangko onangaha.
