Shillong, June 2: Information & Broadcasting Ministry, Fisheries, Animal Husbandry & Darying-ni Union Minister of State Dr L Murugan, salgnina a•dokona re•baaha aro ua na•tok jile cha•enggipa manderang baksana sorkarini dingtang dingtang scheme-ni namgnirangko man•enggipa manderang baksa Bristibar salo agangrikangaha.
Bristibar salo ua Ri Bhoi a•jani Umeit songo na•tok jilchakgipa biapkoba niangaha aro ua biapo ua jolni manderang baksa agangrikengon, na•tokrangko jile cha•anichi sakgipinrangnaba janggi tangani cholrangko on•china didiangaha. Apsan salon, ua Umiam warionaba re•ange, Umiam chibimao na•tok bi•sarangko watangaha.
Iani ja•mano Dr Murugan, Ri Bhoi a•jani Mawpun Kshaid-o donggipa Meghalaya State Fisheries Research & Training Institute-ona re•ange na•tokrangko jilna gita skie ra•enggipa manderang baksaba agangrikangaha.
Ia tom•anio ua na•tok jile cha•enggipa manderang baksa agangrikengon, batanggimin bilsichetni gisepo fisheries-o nangchakegipa ma•mong sorkarini dingtang dingtang scheme-rangni bidingo agan-talate on•angaha.
Blue Revolution-ko ong•atna gita ma•mong sorkarini ra•gatgipa Pradhan Mantri Matsya Sampada Yojana (PMMSY)-ni gimin talataniko on•angengon, 2020-21 bilsioni 2024-25 bilsiona a•songni pilak a•dokrangon na•tok jilani kamrangko tang•doatna gita ma•mong sorkari, gong kror 20,050-ko chamaha ine parakangaha.
Ia PMMSY scheme-ara 2024-25 bilsini gisepon a•songo na•tok jile man•aniko ton lak 70-chi bariatenba, gong kror 1,00,000-ko man•dapna miksonge ra•gatgipa scheme ong•a ineba Dr Murugan parakataha.
Batanggimin bilsirango COVID-19 sajinmani a•sel neng•nikanirangko man•na nangahaoba, ia bilsini gisepo na•tokrangko gipin a•songrangona watanichi gong kror 59,000-ko man•dapna amaha ineba ua aganaha.
Ja•mano ua Shillong songjinmao a•dokni BJP dilgiparang baksa tom•e chanchirimangaha.
