Shillong, Jan 10: Meghalaya a•doko class 1-oni class 10-ona NCERT textbook-rangko January 16 tariko a•bachengatna manchisamsoahaoba unsalo, a•songni President Droupadi Murmu, a•dokona re•baengani gimin NCERT textbook-rangko January 25 tariko a•bachengatskanaba gnang ine Budbar salo, Meghalaya a•dokni Education Minister Rakkam A Sangma parakataha.
Sangma-ni aganani gitade, NCERT-ni textbook-rangko ia bilsionin jakkalna siengahani gimin textbook-rangko ia jaonin dokkanrangona sokatgnok.
Ia bilsio NCERT-ni textbook-rangko, English, Maths aro Science gita dakgipa subject-rangko ra•gatna sienga maina ia subject-rangode bang•e taridapna nanganirang dongjawa ineba Education Minister aganaha.
Social Science subject-o joltangni kamrangkoba taridapna nangengani gimin sorkari dingtangmancha committee-ko songenga ine janapatengon, kamrangko ia bilsi gimik ka•anggen ine Sangma parakataha.
Ia bilsini gisepode NCERT-ni textbook-rangko chu•gimik ra•gatna man•kujanaba gnang indiba mikkang bilsiode MBOSE-o NCERT-ni text book-rangko chu•gimik ra•gatna man•gnok ineba Education Minister, an•tangni ka•dongchakenganiko parakataha.
