Shillong, Apr 21: University Grants Commission (UGC)-oni u•iataniko on•manahani gimin Meghalaya a•dokoba under graduate course-rangna North Eastern Hill University (NEHU)-ni college-rango admission-ko ra•na nangenggipa chatro chatrirang, da•ode Common University Entrance Test (CUET) 2022-ko sena nanggnok.
Iani bidingo Bristibar salo, Meghalaya a•dokni Education Minister Lahkmen Rymbui, dingtang dingtang college aro university-ni principal-rang aro gipin dilgiparang baksa tom•e chanchirimangani ja•man, kobor ra•timgiparangna talataniko on•angengon, UGC-oni ge•etaniko man•ahani gimin Meghalaya a•dokoba ia CUET 2022-ko a•bachengatna tik ka•aha ine parakataha.
Ia porikkako ra•gatanio maiba neng•nikanirang donggenchimode uamang apsan chanchirime namatani cholrangko sandigen ineba Education Minister parakataha.
Education Minister-ni parakatani gitade, NEHU-ni ning•o donggipa college-rango admission-ko ra•enggipa chatro chatrirang ia CUET porikkako sena nangtelgnok.
Ian mikkangchi chatro chatrirangnan namgni ong•nagipa ong•ani gimin a•dok sorkari, ia CUET 2022-ko a•doko ra•gatna namnikpaaha ineba Rymbui parakataha.
Iana a•dokni pilak biaprangon centre-rangko nanggen aro iana a•dokni Additional Chief Secretary, NTA-ni official-rang baksa agangrikmanaha ineba Education Minister parakataha.
