Shillong, May 2: University Grants Commission (UGC)-ni ge•etanio pangchake North Eastern Hill University (NEHU)-ni gitaba university-ni ning•o donggipa dingtang dingtang college-rango under graduate course-rangna ia 2022-23 bilsionin Common University Entrance Test (CUET) 2022-ko a•bachengatna tik ka•aniko dingtang dingtang dolrang jegaltokengon, ia bilsiode Meghalaya a•dokko CUET-oniko watkuchina mol•molaniko ma•mong sorkari knachakaha ine Sombar salo, Meghalaya a•dokni Chief Minister Conrad K Sangma, New Delhi-oni parakataha.
Undergraduate course-rangna tanggitik CUET porikkako ong•atna parakatanichi chatro chatrirang, college-rango admission-ko ra•na gita neng•nikanirangko man•tokengani gimin adita salrangna skangsan, Meghalaya sorkari, India sorkarina sedoatahachim ine nikna man•a.
Indake ong•engon, da•o dipet Meghalaya a•dokkode CUET-o napatkujana gita ma•mong sorkari ku•rachakaniko on•atmanaha aro iani bidingo bakan u•iataniko on•atna sienga ine Sangma parakataha.
Indake ong•genchimoba Sangma-ni parakatani gitade, ian NEHU-ni ning•o a•dok sorkarini dakchakanichi chalaienggipa college-rangnasan ong•aigen aro gipin central university-rangode ia porikkako sena gita nangaigen.
Meghalaya a•dokni bang•bata college-rangan NEHU-ni ning•o chalaienggipa college-rangsa ong•achim.
