Shillong, June 6: 2020 bilsini NIRF report-o Shillong-ni North Eastern Hill University (NEHU)-ko 49-gipa gadangona tang•onangaha ine mesokahani gimin ia university-ko nambate chalaina man•na gita ta•raken gital Vice Chancellor-ko songe on•china didie, Shillong-ni MP Vincent H Pala, a•songni Prime Minister Narendra Modi-na sedoataha.
“University-o poraienggipa hajalni hajal chatro chatrirangni namgnina ta•raken NEHU-ni VC-ko songe on•china anga mol•molatenga,” ine Sonibar salo, PM Modi-na seatgipa chittio Pala parakataha.
Shillong MP-ni parakatani gitade, NIRF 2020-ni report-o NEHU-ko 49-gipa biapo donataniara batanggimin bilsiona chang 10 bate tang•onangahachim aro 2017 bilsini NAAC report-oba NEHU-ko chalaiani kamrang namsrangjaengani gimin janapahachim.
Batanggimin bilsi 5-na NEHU-ko chalaianio kamrang namen namsrangjaha aro NIRF-ni rank on•anian ia university-ni kamko mesokani ong•enga ineba Pala parakataha.
Iani bidingo ua Union Education Minister-naba sedoatmanahachim indiba da•onan maming kamrangko ka•kujaenga ineba Shillong-ni MP parakataha.
Indake ong•engon, NEHU-ni dingtang dingtang department-rango skigiparangni kamrang bangbang ong•e dongengkua aro skigiparang chu•ongjaengani a•selan chatro chatrirang neng•nikanirangko chagrongna nangtokenga ineba Pala parakataha.
