Tura, Sept 06: Bading-chiwalani aro bading-chiwalanirangko a·bachenganio dingtang dingtang cholrang dongani gimin manderangna ma·siate on·ani ingipa katta ja·pango pangchake, PRIME, Meghalaya-ni nirokatanichi aro dakchakanichi, NEHU, Tura campus-ni Placement & Counselling Cell aro Department of Management baksa nangrime NEHU, Tura-ni Entrepreneurship Promotion Development Programme Incubators, Butbar salo North-Eastern Hill University, Tura Campus -ni Department of Management-o workshop-ko salsana ong·atangaha aro ia workshop-o NEHU Tura Campus-ni dingtang dingtang department-rangoni chatro-chatrirang bakko ra·angtokaha.
Salni programona mongsonggipa ong·e sokgipa a·jani Deputy Commissioner Pa Jagdish Chelani, unomiting jinmana aganprakangengon, bading-chiwalanirangko dakani gimin chadamberangko didina gita iandakgipa awareness programme-rangko nangchongmotengani gimin aganangenba, bading-chiwalanirangko dakanichi janggi tangani cholko tang·doatna gita Meghalaya sorkarini on·enggipa bang·a cholrang aro scheme-rangoniko chadamberang dakchakaniko ra·na gita man·gen ine ua parakataha.
Iana skang, Workshop Director Prof. Abhigyan Bhattacharjee, bading-chiwalani bidingo chadamberangna dakchakaniko on·na aro bading-chiwalaniko a·bachengna gita tangka-paisarangko on·ani aro kamrangko ka·na nangani gimin che·em-che·em ma·siate on·na gita miksonge ia workshop-ko ong·ataha ine aganangaha.
Ia workshop-o PRIME start-up Hub Tura-ni Programmme Associate, Ma Tridha Ch Sangma, mongsong aganprakgipa ong·e bakko ra·angaha aro Tura-oni sakgni bading-chiwalaniko a·bachengenggipa start-up Mini Bazaar-oni Rudy D Marak aro Start-up Seven Cherri-oni Ma Samanda Marak-maangko ia programo aganprakna gita dingtangmancha okamaha.
Iakoba poraie nina man·gen: Tinsukia district-o gari bolgni chapekgrike saksni manderang sia
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
