Shillong, Sep 4: Shillong songjinmani NEIGRIHMS sambao donggipa nalao ma·sina man·gijagipa manderang, sigimin wak bi·sa mangskuko gale donangaha aro iana jolo songdongenggipa mande saksa Nicholas Kharkamni, ba jekon RJ Nicky ineba mingachim, an·tangni suk ong·gijaniko parakataha.

Iani bidingo chanchirimna gita ua dingtangmancha Dorbar Shnong Mawkasiang-ni membor-rang baksa tom·anikoba ong·atangaha.

Iandake sigimin wak bi·sarangko nalao gale donangahani gimin an·tangni suk ong·gijaniko parakatengon, maikai sigimin matburingrangko manderang, name gope galgija manderangni nikao gale donangaha ine Nicholas sing·doataha.

Ia wak bi·sarangni mangsaode lekka tapa dongani gimin ian game ge·e cha·enggipa manderangko dakchakna gita Meghalaya sorkarini ra·gatgipa Meghalaya Backyard Piggery Mission-ni ning·o suale on·enggipa wakrangde ong·jama ine jolni manderang sing·doangtokaha.

Iandake sorkarini on·gipa bosturangko galaniara mandeni gam jinna noksan ong·ataniko ra·baanisa ong·enga ineba jolni manderang parakataha.

Iandake sigimin wakrangko jinmani biapo gale donanganiara manderangni an·seng baljokanina kenchakna nanganiko ra·baani ong·enga ineba manderang, ia biapo sigimin wakrangko gale donanggipa manderangko sandie rim·china dabiangtokaha.