Shillong, May 24: Shillong songjinmani North Eastern Indira Gandhi Regional Institute of Health & Medical Sciences (NEIGRIHMS)-o kam ka·enggipa manderangoni sak 125-na baten COVID-19-ko man·aha.
Sombar salo NEIGRIHMS-ni public relation officer (PRO) Dr Cornerstone Wann-ni u·iatani gitade, hospital-o kam ka·enggipa doctor-rang, nurse-rang, ward attendant-rang aro gipin kam ka·giparangko man·chape gimik sak 125-mangni gita COVID-19-na porikka ra·anio positive ong·giparang aro quarantine-o dongenggiparang ong·a.
NEIGRIHMS-o kam ka·enggiparang bang·batan COVID-19-ko man·ahaoba hospital-o sae dongenggipa manderangna nirok sandianirangko aro sanna bananirangko on·na gita administration, nanga gita ja·kurangko de·aha ineba Dr Wann parakataha.
“Iandakgipa somoirango salgro salaramni manderangna NEIGRIHMS, sae dongenggiparangna aro OPD-o sannanirangko ra·enggiparangna dangdike on·angkugen,” ine NEIGRIHMS-ni PRO parakataha.
Hospital-o aro noktangtangoba COVID-ko warachakna dongimin niamrangko ja·rikangkuchina gitaba ua manderangko didiataha.
