Tura, Dec 09: Ning·joljol kobor on·sretako man·e bobil dolni kosako operation-ko ong·ato Nagaland a·dokni Mon district-ni ning·ogipa Oting songoni ramram manderangko bobil dol ine ma·sisrete a·songni chelchakgipa sipai dol Army-rangni jakchi re·anggipa anti Sonibar salo gogala man·gipa manderangna chu·gimik chakpaaniko mesokna aro A·chik a·songo adita salrangna skang, Tra Grenchira M Marak-ko kragija dake ka·saninggija so·otaniko jegalgrimna, North Eastern Students Organisation (NESO) dol, Bristibar salo West Garo Hills-ni Deputy Commissioner-ni office mikkango asonge jingjengatangaha.
Ia jengjengatanio, A·chik a·songni dingtang dingtang organisation-rang jekai ADE, AYWO, FKJGP, GSU aro gipin organisation-rang baksana Tura Govt. College-ni chatro-chatrirangba bakko ra·angtokaha.
Nagaland a·dokni Mon district-o sipai dolrangni ramram manderangko skatang so·otaniko aro A·chik a·songoni saksa me·trako ka·saninggija dake so·otaniko jegalangenba, ong·nanggija obostako chagronggiparangna kakket bichalko on·china gita chatro dol dabiangaha.
Indake ong·engon, a·songni chelchakgipa sipai dolna dingtangmanchagipa bilko on·e ia ka·namgijagipa niamko ra·gataniko salgro-salaramoniko ra·galpilchina gita NESO dol changni-chang dabianirangko dakengachim.
Jingjengatao, salgro-salaram a·jolrangni manderangko India sorkari onbate ra·na nangja jechin a·songni bak ong·paoniko batesa chel·tangroroatgen ine janapatan baksa, iani bidingo ru·utgijan uamang India sokarina sedoatgen ine chatro dolni dilgiparang parakataha.
