New Delhi, June 6: Committee-ni chairman Mayralborn Syiem-ni dilanichi Meghalaya Legislative Assembly-ni Estimate Committee, Sombar salo, New Delhi-o maikai sorkari skulrangko chalaienga, uko nie ra•eaha.
Estimate committee-ni chairman Mayralborn Syiem baksana ia skulrangko nieanio, committee-ni membor-rang aro a•dokni MLA-rang, chong•motan Charles Marngar, Remington Momin, Limison Sangma aro Miani D Shira-ba dongpaaha.
Ia committee-ni membor-rang, New Delhi-ni Kishan Ganj Nai Basti-o donggipa Rajkiya Pratibha Vikas Vidyalaya-ko re•ange nieaha.
Ia skulrangko nieani ja•man Estimate Committee-ni parakatani gitade, ia sorkari skulrango donggipa classroom ge•antion CCTV camera-rang, digital classroom-rang, laptop-rang aro library-rang donga ine uamang nikna man•aha.
Ia skulrango sorkari, health clinic-rangkoba dona janapatengon, ia clinic-o ANM saksa, Psychologist saksa, dingtang dingtang kamrangko ka•na mande saksa aro doctor saksako dona ine estimate committee parakataha.
Meghalaya Legislative Assembly-ni estimate committee membor-rangko Delhi Legislative Assembly-ni Estimate Committee membor-rang, chong•motan Chairman Rajesh Gupta, MLA Ajay Dutta aro Delhi-ni gipin MLA-rang, ia sorkari skulona re•dilangaha.
Indake ong•engon, Meghalaya a•dokni Estimate Committee membor-rang, manderangna aro mongsongbate kangal cholgrirangna Delhi sorkarini indin kulie on•gipa dam 521 mohalla clinic-rangoni damsako re•ange nieaha ineba kobor on•aha.
Delhi-ni mohalla clinic-rango X-ray ra•ani aro an•chi porikka ra•anikoba indin on•enga aro samrangkoba indin on•enga ine u•iataha.
