Tura, Feb 26: Chu·gimik ja 31-ni dormaharangko man·chiptokjaengani gimin bil man·giparangni kosako jegalenba Garo Hills Autonomous District Council (GHADC)o kam ka·enggipa Non-Gazetted Employee Association (NGEA)ni da·omiting sima-gri jingjengatanirangko dakatengani gisepon, Tura songjinmani ma·gipa pagiparang Sukrobar salo NGEA-ni dilgiparangko gronge agan-golpogrikenba chi watanirangko dontongatpajachina mol·molangani ja·man GHADC-ni gimik chi rongdikrangoniko chiko watgija dontongatna tik ka·giminko ra·galpilaha.
GHADC-o kam ka·enggiparang mija February 18 tariko jinma re·jome jegalaniko dakangaoni da·alona kingking kamtangtangko ka·gija dontongattokengon, Sonibar saloni intal GHADC-ni gimik chi rongdikrangoniko chiko watgija dontongatsrangna manchiahachim.
Iani bidingo NGEA-ni padot Pa Senora Jhony Arengh-ni koborna parakatani gitade, Tura songjinmao songdongenggipa ma·gipa-pagiparang, chirangko watgija dontongataniko dakpajachina mol·molahani gimin aro manderangni neng·nikaniko ma·sichake chirangko watgija dontongatna chingni miksonganiko ra·galpilaha ine talataha.
“Chinga na·simangni neng·nikanirangko aro dukrangko ma·sichaka, chinga na·simangna chu·gimik chakpaaniko on·a aro chingni chakpaani gita chinga iana lekka sedogen, indiba chi mangmangkode na·simang dontongatpanabe” ine ma·gipa pagiparang mol·molahani gimin NGEA-ni dilgiparang chi wataniko dontongatjawaha ine uamangna ku·rachakataniko on·aha ineba association-ni dilgipa janapataha.
Indake ong·genchimoba, jena kingking skotong minister kam ka·enggiparangni man·kugijagipa ja 31-ni dormaharangko on·na gita seachi ku·rachakkuja dipet chinga gimikan kamtangtangko ka·gija dontongangkugen ine NGEA-ni dilgiparang parakataha.
