Tura, March 12: Chu·gimik ja 31-na batpile dormaharangko on·gija donengani gimin uamangni dormaharangko on·china dabie, Garo Hills Autonomous District Council (GHADC)-o kam ka·enggiparang re·anggipa March 10 tarikoni 12 tarikona okgimu chake jingjengatgenchimoba a·dok sorkarini namrenge ra·engani gimin dingtang ja·kuko de·e jingjengatskana tik ka·angaha.
GHADC-o kam ka·enggipa NGEA, re·anggipa February 19 tarikoni da·alona kingking kamtangtangko ka·gija jingjengataniko dake salgittamna okgimu chakahachim, indiba a·dokni skotong minister Pa Conrad Sangma-ni maming ka·dongatani kattarangko aganchakna gisiko nangjaengani gimino rakbata ja·kuko de·angskana gita jinma tom·e chanchirimangaha.
NGEA-ni tom·e chanchirimanio tik ka·ani gitade, re·baenggipa March 16 tarik, Mongolbar salona skotong minister-na somoiko on·angkuaha. Uni gisepon NGEA-ni da·o dabienggipana maming ka·dongani kattako aganchakja ong·ode, March 17 tariko a·dokni skotong songjinmaona doange GHADC-o kam ka·enggipa NGEA-ni manderang March 18 tariko Shillong Main Secretariat Office mikkango asonge jingjengatangskagen ine NGEA-ni jakrikra Pa Brithen M. Sangma koborna parakataha.
Shillong songjinmao asonge jingjengataniko dakengon, dingtang dingtang NGO-rang aro A·chikskarang, GHADC-o kam ka·enggiparangni dormaha gri dukko man·enggiparangna chakpaaniko on·na sikgiparang dongode bakko ra·pana man·gen, uamangko NGEA-ni gita rimchaksoa ineba Pa Sangma agan-janapataha.
