Tura, Feb 23: Garo Hills Autonomous District Council (GHADC)o kam ka·enggipa Non-Gazetted Employee Association (NGEA) uamangna ja 30-ni dormahako on·kujaengani gimin dingtang dingtang dake jingjengatanirangko dakengon, mija February 19 tariko skotong minister Pa Conrad Sangma-ni parakatgipa kattarangko ra·chakna man·jae jegalatan baksa skotong minister iana namgipa koborrang baksa NGEA-na seachi u·iatkuja dipetde GHADC-ni pipe siltong gita chi watanirangko Mongolbar saloni dipet dontongatna gita agan-parakataha.
NGEA-ni jakrikra Brithen Sangma-ni kobor ra·timgiparangna aganani gita, skotong ministerni ku·watgipa kattako chinga bebera·na amja ine aganengon, re·anggipa bilsi December jao jagnini dormahako on·atjokchim, indiba da·alona kingkingba bang·bata kam ka·giparangan ua dormako man·sotokkuja aro jena kingking skotong minister Pa Conrad Sangma, NGEA-ni dilgiparangko gronge agangrikja aro ku·sikchi agana baksana seachi ku·rachakaniko on·ja dipet chingni jingjengataniko dontongjawa ine koborna parakataha.
Iani gisepon, gital pay scale-ko on·china NGEA dabiahaoba, chu·gimik bilko jako ra·e GHADC-ko nirokenggiparang tangka-paisarang chu·ongja ine gitcham pay scale-ko on·genchimoba NGEA uko ra·chakahachim, indiba da·alonan ua jagnini dormahako man·tokkuja, indide da·alo skotong ministerni agananggipa kattako NGEA maikai ra·chakna amgen ineba NGEA-ni dilgipa parakataha.
NPP-ni EC gitchamrang dormaha on·na man·gija galchipani ja·man administrative jako ra·ahaoba dormahako on·na man·chipja, indide GHADC-o kam ka·enggiparang maio pangchake ka·dongkugen ine aganenba, “Gitcham pay scale-ko on·na ku·chake chu·gimik bilko jako ra·enggiparangni mol·molaniko chinga knachakaha aro December jaode jagnini dormahako man·gen ine ka·dongsoachim, indiba ka·donggramaiaha ine aganan baksa, dormaharangko saoba man·a, saoba man·kuja dakanio chinga chonchongipa kamko ka·e cha·enggiparangni neng·nikaniko chu·gimik bilko jako ra·e nirokgiparang ma·sichakja, iara chingko kal·steka ong·jama?” ine NGEA-ni dilgipa sing·doangaha.
Una agreba, je MDC-rangan Lokayukta aro High Court-o mamlarang donga aro GHADC-ko cha·bokanggipa gitcham dilgiparangna da·o MDC-na pu·onatanio uamangni nomination lekkako on·anganiko ra·chakjachinaba NGEA dabienga. MDC gitchamrang tangka-paisarangko skatang jakkale bon·ataha aro ua tangkarangko gampilna man·jaode uamangko niam gita rim·na nangchongmota ine dabiangan baksa, chingni dabianirangko knachakja ong·ode NGEA, mikkangchi rakbate ja·ku de·angkugen ineba association-ni dilgipa koborna parakatjolaha.
