Resubelpara, February 13: Bristibar salo, Ante Natal Care (ANC) camp-ko Resubelpara CHC-o ong•atangaha, jeon sak 100 an•o donggipa me•chikrang bak ra•angan baksana sanna bannani aro dakchakanirangkoba on•angaha.

An•o donggipa me•chikrangko sannanio namen sapbegipa gynecologist Dr. Vince Chimpoo M Momin aro Dr. Abida M Marak, ia camp-ko ong•atgipa biapo OPD check-up ka•ani, ultrasound ka•ani aro oko dongenggipa me•chikrangna councelling-rangkoba on•angaha.

North Garo Hills-ni Assistant Commissioner, Torali K Marak, mongsonggipa sokgipa ong•e aganprakengon, an•o dongani ja 3-ni gisepo senggnang Ante Natal check-up ka•na nangchongmotani gimin u•iatangaha. Uasan ong•aigija, oko donggipa me•chikrang sakantikon bimungrangko segatenba, health department-ni gita on•enggipa ANC-ni namgnirangko jakkalchina gitaba ua didiataha, maina check-up aro test-rang ka•jringanichi ma•gipa aro bi•sako an•seng baljoke rakkina gita dakchaka.

District Medical & Health Officer-ni dolrangko ia program-rangko ong•atanina aro an•o donggipa ma•gipa aro bakgitchak bi•sarangni sianiko champengna sorkarini jotton ka•anirangko mesoke on•anina ua demittelangaha. ASHA worker-rangni kamrangkoba ua namnike ra•chakangan baksana ANC-ni namgnirangko man•a gita oko donggipa me•chikrangko ku•mong nangrime kamko ka•na gita didiataha.

SDM&HO aro Aspirational Block-ni DNO, Dr. N. R. Marak, batanggimin sal aro somoirango, ANC-ni namgnirangna 51% mangni gita oko donggipa me•chikrang bimungrangko segataha ine talate on•angaha. An•o donggipa ma•gipa aro atchidaldal bi•sarangni sianiko komiatna miksonganiko aganan baksana, ma•gipa ong•na sienggiparang, mongsongbate an•o dongmitingo neng•nikanirangko man•enggiparangko bimungrangko senggnang segatenba name simsak nirokani aro sana bananiko dakchina gitaba didiataha.

Ia program-ko ong•atanio gipin aganprakgiparangara, DM&HO Dr. PS R Sangma, DIO-ni incharge Dr. R K Sangma aro  ICDS-ni Lady Supervisor S G Momin ong•a.

Na·simang ia video-koba nina man·gen:

Na·simang iakoba poraina man·gen: Chang 39-gipa National Games-ko M’laya-o sokachakna on•enganina IOA-ko mittelpila

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- https://www.instagram.com/ne_media_hub