Resubelpara, May 8: North Garo Hills a·jani skotong song Resubelpara-oni km 10 mang chel·ao donggipa Chidaret songo PMGSY sorokko kam ka·enggipa sakgni manderangko silchidare jakbitgipa ma·sina man·gijagipa sak 3 manderangni mija May 6 tarik pringwal 3:30 bajimango rim·sruke ra·anggiparangko naljokataha ine koborna u·iataha.
Iani bidingo North Garo Hills a·jani Superintendent of Police (SP), Pa Abraham T Sangma-ni u·iatani gitade, apsan salon rim·srukanggipa denggu dakgiparang uamang sakgniko name watatpilna gita duko ga·akenggipa nokdangni maharirangna aro manager-na phone ka·e tangka gong lak 5-ko on·china dabiatahachim.
Koborko man·soe, NGH police dol May 7 tariko ta·raken ua rim·srukanggiparangko naljokatna gita am·sandianiko a·bachengataha ine Pa Sangma koborna talataha.
Indake, police dol gisiko nangbee aro neng·bee rim·srukanggipa sakgni manderangko am·sandienba May 7 tarik attamo uamangko Rongrong jolni diltugipa buring-bolgrimo donggipa rong·koloniko jokataha ine Pa Sangma u·iataha.
Rim·srukgiparangoni mongsonggipa sakgni manderang baksa uamangoniko songtango tarigipa ge-4 slairangkoba man·aha aro uamangoni saksade kate jokahachim, indiba da·al attamchibara uni dongnugipa biapko ma·sie sandiangenba Manda Rari-oniko rim·na man·aha ineba SP u·iataha.
Dosi dakanio rim·ako man·gipa apsan mandekon re·anggipa 2020 bilsini January 24 tarikoba Assam-ni badinggipa saksako Dingok bajaroniko rim·srukani mamlao rim·ahachim, indiba jamin man·e pattokoni jokbaaha aro uni ja·manoba apsan namgijagipa kamkon a·bachengtaiaha ineba Pa Sangma u·iatkuaha.
Rim·srukanio jak donggipa manderangoni saksade bilsi sokkugijagipa chadambe ong·achim.
Rim·a man·gipa sakgittam manderanga, bilsi 36 ong·gipa, Bajengdoba Police Station-ni ning·ogipa Nengsa a·pal songoni Pa Rajesh B. Marak-ni depante Repen R. Marak, jekon Togan ineba mingachim aro apsan PS-ni ning·o ga·akgipa Raja A·pal songoni bilsi 20 ong·gipa Pa Kilbirth K. Momin-ni depante Danseng G Momin ong·a aro sakgipinara bilsi 15-ni chadambe ong·achim.
