Shillong, August 23: Batanggimin somoio Meghalaya aro Assam a·dok damgnini sima arina songgigrike segrik jotgrikrangko daknio Meghalaya-ni adita songrangko jedake Malang, Joypur, Salbari aro Huwapara-ko Assamo napchapatani bidingo ra·chakna man·jae Meghalayani nangrimgimin NGO-rang Shillong Civil Hospital sambao asonge jegalaniko dakani ja·mano A·dokni Skotong Minister Conrad K Sangma aro NGO-ni dilgiparang asongrime agangrikaniko August 23 tariko dakangaha.
Skotong Minister Conrad K Sangma NGO-rang baksa agan chanchigrikani ja·mano kobor ra·timgiparangna aganengon, ian batanggimin bilsi 2011-o a·dok damgnini gisepo map wa·reng salgimino pangchakesa segrik jotgrikaniko dakaha aro iano maming dingtang dakteani dongja. Kakketko aganode ian 2011 bilsion Assam a·dokni Map-o napgiminsa ine Sangma aganaha. MoU ba Songgigrike segrik jotgrikaniko ra·galpilna dabienggipani bidingo sing·on, ra·galpilna miksonganide dongja indiba adita namdapatna nanganirangko nigrike gnigipa changni segrike jotgrikaniko namdapatna kam ka·anggen ine Conrad K Sangma aganchakaha.
FKJGP-ni President Pritam Arengh-o kobor ra·timgiparang sing·on, Skotong Minister baksa agangrikanio nama aganchakaniko man·aha aro mitam a·arang jean Hima aro Nokma-ni ning·o donggiparangko Assamo napchapatanirangko ra·galpilchina ba nipile kamko ka·china agangrikaha ine Pritam Arengh aganaha.
Ian Pakistan a·song baksa sima arini bidingo meligrikna man·gijagipa gita ong·jaengani gimin a·dok damgnini gisepode golpogrike nipiltaie namatna nangchongmota ine KSU-ni Padot Lambok Marngar aganaha.
