Tura, Dec 12:Garo Hills-ni nangrimgimin NGO-rang jekai Federation Khasi Jaintia and Garo People (FKJGP), Garo Students’ Union (GSU),A·chik Youth Welfare Organisation (AYWO) and Association for Democracy Empowerment (ADE), Sonibar salo Tura MP Studiam sambao jinma tom·dake Inner Line Permit (ILP),Meghalaya Residents Security and Safty Act (MRSSA) aro Garo Customary Law (GCL)-ko ta·rake ra·gate on·china chrik a·boke dabiangaha aro unbaksana Garo Ku·sik-ko 8-gipa Schedule-o ra·gatchina, Garo Hills Autonomous District Council (GHADC) Election-o Rorirang ba gipin jatrang bak ra·na man·jawa aro CAA-ko ra·galpilchina dabie jegalaniko dakenba CAA aro NDA sorkariko bimang tarie so·e galangaha.
Re·anggipa 2015 bilsionin ge-13 NGO-rang ILP-na dabibaenga, da·alo bilsi 5 gapilaha indiba sorkari ia dabianiko da·alonaba chu·sokatkuja ine FKJGP-Garo Hills Zone-ni President Pritam Arengh jinmana aganaha.Maidakode A·chik jatko tang·doatna man·gen aro maidakode A·chik jat aro Meghalaya a·doko songdongenggipa manderangni kengnioniko ba gipin jatrangni naprubaengaoniko chel·chaksona aro naljokatna man·gen, iani gimin changni chang Shillong re·taitaie Khasi Hills, Jaintia Hills aro Garo Hills gimikni ge-13 NGO-rang jinma ku·monge Meghalaya a·doko ILP-ko ra·gatchongmotna nanga ine 2014 aro 2015 bilsirangoni da·alona dabienga ineba anganaha.
Ua somoio ILP-na dabianichi rasong gribee manderang siaona sokaha aro mitamrang rim·a cha·jok aro indake NGO-rangni dabimitting somoio saobarang maikoba dake sorkari office-rangko so·aona sokjok aro manderangni janggirang gimaona sokpiljok, indakgipa obostarangko chagronganichi sorkarinaba noksan ong·jok. Unbaksana manderangni kam ka·e cha·anirangko dontongna nangpiljok maina basakoba NCM-ko ong·ataha, basakoba agitation-rangko ong·atanichi gimiknan neng·nikanirang sokaha. Indake neng·nikani ong·mittingo Meghalaya a·doko Congress sorkari ong·engachim aro Dr. Mukul Sangma Chief Minister ong·engachim, uamangba indakede cholijawa, dabigiparangba ong·akon dabienga, uni gimin hai an·ching golposrangna chingniba agananirang donga na·songoniba agananirang donga ingipao chingko okamate changni chang Shillong re·ange Secretarit-office-o chanchirimaniko dakangaha ineba Pritam Arengh aganaha.
Indake gitcham Congress sorkari baksa golpogrikanio,ILP-ko ra·gatanide Ma·mong sorkarini ning·osa, chingade bil dongja, uni gimin na·simang ILP-ko dakgrika ong·ode ka·sine persue ka·bo ta·rake persue ka·nabe, mikkangchi na·simang ka·naode ka·bo indiba da·alo chinga na·simangna dingtang dakgipa ILP-ni line-o apsangipa ‘Comprehensive Mechanism’-ko on·skagen,jean ILP gita apsangipa niam ong·gen uan Meghalaya Residents Security and Safty Act (MRSSA), mingsagipinara‘Benami Detection and Prevension Act aro Salami Act ia minggitam Act-rangko ra·gatgen ine Mukul Sangma NGO dilgiparangna ku·rachakaha ineba ua aganaha.
Congres sorkari indake ku·chakani gisepon ge-13 NGO-rang manderangni so·sojengjeng ong·anina aro neng·nikanirangko chagrongengani gimin sorkarini aganako knachake agitation ba jingjengatanirangko da·aldipet dontonggen ine ku·rachakskaha.Indake sorkari baksa ge-13 NGO-rang see jote on·gija ku·sikchi soi ka·grikaha aro apsandake ge-13 NGO-rang soi ka·grikako man rakkie ua saldipet jingjengataniko dontonge sorkariko nichakaha aro sorkari baksa MRSSA ingipana facility centre-rangko tarina gita dingtangdingtang biaprangko niaha aro land acquisition-na district administration kam ka·engachim, uarangoba kamko ka·pajok ine Pritam Arengh aganaha.Sorkarini pa·sikako chakchike sengtaitaie da·o bilsi 5 gapilengjok, indiba ILP-ko chu·sokate on·kuja, uni gisepon NGO-rang badita bilsiko sengkugen, uni gimin ILP aro MRSSA-ko chu·sokate on·kujadipet dabianiko maming dakeba dontongjawa ine aganaha.Indiba ILP aro MRSSA-na dabiengon an·chi pari nike dabina miksongja indiba ku·rang on·achi, chrik a·bokachi sea jotachisa dabianggen ine ua aganaha.
