Agartala, Nov 4: Tripura a•doko donggipa Assam-Agartala National Highway (NH)-ni Bet Bagan jolo police-rang nirok sandianirangko dakengmiting somoio niam gri re•napbagipa saksni Rohingia-rangko Sukrobar pringo rim•na man•aha.
Ia Rohingiarangara Myanmar a•songo songdongenggipa Muslim manderang ong•achim.
Rim•ako man•gipa manderangara, bilsi 60 ong•gipa Md Ekbal Hossen, bilsi 30 ong•gipa Abdul Gafur, bilsi 22 ong•gipa Azim ullah, bilsi 20 ong•gipa Md Jahanjir Alam, bilsi 21 ong•gipa Jannat Ara, bilsi 19 ong•gipa Sadiya Begam aro bilsi 45 ong•gipa Dilbahar Begam ong•achim.
Ambassa police station-ni officer-in-charge Mizanur Rahaman-ni parakatani gitade, Sukrobar pringo police-rang, rama gita re•ruraenggipa garirangko nirokengmiting somoio Maruti car bolsako rim•aha aro ia garini manderangko sing•sandienba saksni Rohingiarangko niam gri India a•songona napbaahani gimin rim•aha.
Ia Rohingiarang Tripura a•doko donggipa Shunamura sima gita Bangladesh a•songoni re•baaha ine ku•rachakaha aro uamangko Sonibar salo kachario mikkangpaatgen ineba OC parakataha.
