Shillong, Aug 25: Meghalaya a•doko niam gri koelarangko bikotna gita a•dok sorkari, dakchake on•ani katta nakatja ine Bristibar salo, Meghalaya a•dokni Chief Minister Conrad K Sangma parakataha.
National People’s Party (NPP)-chi dilenggipa Meghalaya Democratic Alliance (MDA) sorkarini kosako matnanganirangko dakengani gimin ua Opposition dolni dilgipa Mukul Sangma-koba jegalataha aro ua an•tangan bilsichetna chief minister ong•engmiting somoio niam gri koela bikotaniko champengna gita maming ja•kurangko de•jaha ine una gisik ra•ataniko on•angaha.
Chief Minister-ni parakatani gitade, NPP-chi dilenggipa MDA sorkari jako ra•ani ja•manosa ia sorkari, MMDR Act-ko ra•gatenba, niam gri koela badingenggiparangna rakgipa niamrangko ra•gatna a•bachengaha.
Niam gri koela badingenggipa bang•a manderangni kosakon ia sorkari ja•kurangko de•aha ineba ua aganaha.
Adita salrangna skang, West Khasi Hills a•jani koela a•damo mande saksa siange, sakgipin saknaanirangko man•na nangahani gimin janapatengon, ia koela a•damni nokgipako police-rang rim•aha aro apsan daken mikkangchiba niam gri kam ka•enggiparangni kosako sorkari rakgipa ja•kurangko de•angkugen ine Chief Minister parakataha.
Indake ong•genchimoba, mitam koela a•damrangonade official-rang re•angna gita chol ong•jae, niam gri koela bikotanirangko name nirok sandina man•jaenga ine Chief Minister, suk ong•gijaniko parakataha.
