Shillong, Sep 7: Mawryngkneng rama gita niam gri koela salruraenggipa bol 50 truck garirangko Mongolbar walo, Hynniewtrep Integrated Territorial Organisation (HITO) dol rim•aha ine u•iataha.
Iani bidingo kobor ra•timgiparangna u•iatengon, Mawryngkneng rama gita niam gri koela salruraenggipa truck garirangko uamang Mongolbar walo am•sandienba, bol 50 truck garirangko rim•na man•aha ine HITO-ni general secretary Wanbun Dkhar parakataha.
Dkhar-ni parakatani gitade, ia bol 50 truck garirangoni bol 18 truck garirangni kosakode uamang FIR ka•na man•aha indiba gipin garirangde joke katna man•aha.
Ia ramao niam gri tangka gile ra•anirangkoba nikna man•enga ineba HITO-ni general secretary parakataha.
A•doko niam gri koela salruraanierang dongja ine MDA sorkarini jegalrongengani gimin suk ong•gijaniko parakatengon, iani bidingo uamang BJP-ni state president Ernest Mawrie-na memorandum-ko on•e, a•doko niam gri koela badinganiko CBI aro ED-chi inquiry dakchina dabianggen ine HITO-ni general secretary parakataha.
