Shillong, Oct 22: A·songni pilak niamrangko sechimonge rakkigipa niamni ki·taponiko da·oni chasongna gamchatgijagipa niamrang aro gitchambatgipa niamrang gimikkon ra·galtokna gita ma·mong sorkari tik ka·aha ine ma·mongni Law Minister Pa Kiren Rijiju mija Sonibar salo u·iatangaha.
Ma·mongni Law Minister-ni Shillong songjinmao program ong·atgipao bakko ra·e agananganio, nangchongmotgijagipa niamrang a·songo songdongenggipa ramram mandena bal-bojakosa ong·ataia aro niamrangara manderangna maiba namgniko ra·banasa ong·a, ramram mandeko neng·nikatna ba man·dikatna ong·ja ine aganangaha.
“Niamrangara manderangna bichalko ka·e on·nasa ong·a aro a·songni manderangni janggi tanganirangko man·adipet ong·bewalona ra·bana man·na gita dingtang dingtang dakgipa bilrangko on·anisa ong·a. Uni gimin, ramram mandeni janggi tanganio bal-boja ong·anirangko komiatnade, ua pilak gamchatgijagipa niamrangko jekon ru·uta bilsirangna skang ra·gatahachim aro jerangan da·ororoni somoio gamchatja uandakgipa pilak niamrangko niamni ki·taponiko ra·galna nanggen,” ine Pa Rijiju parakataha.
Ma·mongni minister-ni aganangkuani gitade, ming 1500 na baten a·songni niamrangko sorkari ra·galmanaha.
