Guwahati, Sept 08: A·songo nikronggijagipa gipin ma·malni rokomanti matburingrangko niam gri badingsrukaniko dakenggiparangni kosako am·sandiataniko dake chu·sokgipa ong·anio, songsul a·dok Assam-ni police dolrang ning·joljol koborko man·eming sandiataniko dakenba a·songgipino man·batgipa dingtang dingtang rokomni matburangrang jekai Wallaby (kangaroo rokomsa), Chimpanjee (makkre dal·gipa rokomsa), nikronggijagipa makkrerang, ki·singrangko man·chape gimik-gimang mang 40 nikronggijagipa matburingrangko Assam, Kamrup district-ni Rangia-ni National Highway 31 ramadilo sekrikaha ine koborko man·soaha.
U·iatani gitade, ua matburingrangko salbana gita jakkalgipa bolgni SUV garirang jeni nomborrangan Delhi-oni ong·a aro tol·e tarigipa Army-ni sticker-ko tape sale ra·baenggipa sakgni manderangkoba rim·aha.
Iani bidingo police-ni u·iatani gita, a·bachenge sing·rok-sanrokaniko dakanichi ma·siani gitade ua matburingrangko Mizoram-oniko salbaengachim jerangkon songsul a·song Myanmar-chiniko niam gri badingsrukataha. Indake ong·engon, Asam police ua rim·rikgipa matburingrangko Forest department-na pakwatatgen ineba u·iataha.
Ia bilsini April jaosan North Bengal-ni forest official-rang Australia a·songo man·batgipa matburing, tangkuenggipa kangaroo-rangko aro mangsa sigimin kangaroo-ko Biakunthpur-oniko man·aha.
Apsandaken, ia April jaon ning·joljol koborko man·e sandiataniko dakenba Hajo jolni rama tong·sao gari bolsako rim·rike forest official-rang uoniko ma·malgipin kangaroo (wallaby) mangsa aro nikronggijagipa makkre mangbongako chipe ra·bagipa kacha ge·dokko Assam-ni Kamrup district-o sekrikaha.
