Shillong, Oct 01: A·dokni National Institute of Technology Meghalaya-ni 8-gipa convocation-ko Sukrobar salo Shillong-o ong·atanganio ma·mongni Education Minister Pa Dharmendra Pradhan online gita bakko ra·e jinmana aganprakangaha.
Tom·anio, National Institute of Technology, Meghalaya (NIT-M) uamangoni sakgnina dingtangmancha changa-sapa tangtangchi institute-na nambegipa on·gilanirangko dakahanina Honorary Doctorate-rangko on·angaha.
Manderangni kamo jakkaltonagipa software BSAFE-ko tarianina aro NIT Meghalaya, India-na power plant-rangko tarisamoe institute-na bang·en on·gilanirangko dakahani gimin Professor D N Buragohain-na Honorary Doctorate-ko on·angaha. Apsandake, music ba doka-damani a·bao institute-na on·gilanirangko dakgipa Neil Herbert Nongkinrih-naba Ph.D. degree-ko on·e dingtangmancha mande ra·aniko dakangjolaha.
Ia convocation-o mongsonggipa sokgipa ong·e bakko ra·anggipa ma·mongni Education Minister Pa Dharmendra Pradhan-na agreba, National Accreditation Board-ni Chairman Prof. (Dr.) KK Aggarwal-ba ua somoio bakko ra·angaha.
Iarang baksana, salni tom·anio institute-o poraienggipa sak 19 chato-chatrirangna PhD degree-ko, sak 34-na M.Tech-ko, sak 37-na MSc-ko aro sak 124-na B.Tech degree-rangkoba on·angaha.
