Shillong, Oct 26: Mongolbar attamchibara, Shillong songjinmao gitchambatsranggipa aro dal•batgipa Bara Bazar (Iewduh)-o jolongga kingsaoni wal•ku ong•katani ja•man manderang boma ine ma•sisretenba kenjagokani ong•kataha.

Bara Bazar-o dokkan dakenggipa manderangni u•iatani gitade, ia jolonggaoni wal•ku ong•katako nikon ia biapo dokkan dakenggipa manderang pilakan dokkantangtangoni ong•katbildange katna a•bachengtokaha aro dikdiksani ja•manon police-rang ua biapona sokbae, ia biap gimikon kapenge donataha.

Ia biapona sokbaani ja•man police-rang ia jolonggako kolame nion, ia jolongga ning•o nitrogen gas joke dongengako nikaha.

Batanggimin somoirango Shillong songjinmani dingtang dingtang biaprango bomarangko donangahani gimin Mongolbar saloba manderang, ia jolonggaoniko wal•ku ong•aton rang•san kenjagokatani ong•kattokaha.

Batanggimin jaosan Laitumkhrah-o IED boma gopretahachim aro uni ja•man Lachumiere-o donggipa NPP office sambaonikoba IED bomako man•ahachim.