New Delhi, Dec 6: A·dita salrangna skang, Nagaland a·doko Army-rangni simsakgija dake bobil dolni kosako operation-ko ong·atao rasong gribee Nagaland-oni sak 14 ramram manderangni janggirang gimaanina Parliament-o suk ong·gijaniko parakangan baksa, ka·namgijagipa niam AFSPA-ko ra·galchina gita warachakgipa dolni MP-rangni chrik-a·bokangtokanina ma·mongni Home Minister Pa Amit Shah, Sombar salo Parliament House ge·gnion ia a·sel-obostani bidingo agan-talatanikoba on·angaha.
A·dokni ramram manderangko goaniko aroba AFSPA-ni kosako raken jegalate ku·rangko on·anirang apsandake Assam-oniba sokaha, je biapon ia apsan niamkon ra·gatengachim.
CPI(M) dolni saksa namen a·gipi dilgipa Hemen Das, Nagaland a·doko ong·anga obostako bobil dolni kam gita toe aganangaha.
Unbaksana, “India sorkari, ia ka·namgijagipa bewalrangchi Army-rangni sason ka·ani niam AFSPA-ko ra·galna nanga aro a·songni chong·motgipa manderang gita rasong chae janggi tangna salgro-salaramni manderangna cholko on·na nanga ine Assam Jatiya Parishad-ni General Secretary Pa Jagadish Bhuyan aganangskaaha.
Armed Forces (Special Powers) Act, ba Army-na dingtangmancha sason ka·na gita bilko on·ani niam AFSPA-ko baditaba chasongrangonin Nagaland-ko man·chape, salgro-salaramni mitam bakrango ra·gatahachim. Ia on·gimin bilrango pangchake, a·songni chelchakgipa dolrang ia niamko donatgipa je biapoba uamangni nangnika gita operation-rangko ka·na man·a baksa, rim·na mamingko u·iatchenggijan dos donggiparangkoba uamang rim·na man·aia.
