Mother Theresa-ni atchiani bilsi chang 111-gipako gisik ra·ani salo, an·tangni gimin chanchigija a·songni kangal-cholgrirangna bimchipe dangdike on·anggipa aro Nobel prize-ko chepilgipa mandeko a·song gimikni bang·a dingtang dingtang dilgiparang mijal Bristibar salo mande ra·aniko dakangtokaha.
Saint Theresa ba rongtalgipa Theresa ine je mandekon okamachim, uni namgipa kamrangko a·gilsak gimikni manderang namniktokachim aro uko namen mandeba ra·achim.
Mingsing-minggama man·pilgipa Mother Teresa, Republic of Macedonia-ni skotong, Skopje-o skang 1910 bilsini August 26 tariko atchiaha. Indake, Agnes Gonxha Bojaxhiu-ni jakchi ua napbolatako man·aha. A·songoni kangal-cholgrirangni obostarangko nike uni gisiko ka·sachakanian gapaiaha, indake Mother Teresa, West Bengal, Kolkata-ona wenbani ja·man India-on songdongkamna gita tik ka·aha aro uandaken sagipa manderang aro kangalrangko ua, uni janggi tanga gimikna nirokangaha.
Mande jatna ka·sae uni bimchipe dangdike on·ani kamrangko gisik ra·angengon, “Bharat Ratna aro Nobel prize-ko chegipa Mother Teresa-ko uni atchiani salo gisik ra·a,” ine Union minister Pa Hardeep Singh Puri, Twitter-o see parakataha.
Unomiting, “Tata Steel-na kam ka·e on·ani ja·man, Kalighat-o donggipa Mother Theresa-ni ashram-o anga volunteer ong·e dangdike on·baaha aro ua somoio anga gisikni gita dal·rorona man·aha jechin mande jatna janggi tanga gimik dangdike on·china gita angko didiaha. Uko gisik ra·na krae, manderangni janggiko uni dangtapa man·gipa million manderang baksa da·alo uni atchiani salko gisik ra·anio angni bakrimpaaniko on·a,” ine Delhi-ni skotong minister Pa Arvind Kejriwal-ba seatpaaha.
Uni atchiani salko gisik ra·angpagipa gipin dilgiparangara – Rajasthan-ni skotong minister Pa Ashok Gehlot, National Congress-ni Pa Tarig Anwar, Pa Sitaram Lamba aro Odisha-ni Governor-mang ong·a.
