Tura, May 24: Meghalaya a•dokni Skotong Minister Conrad K Sangma, Garo Hills a•jarango buring bolgrimrangko ripingani ja•kurangko de•engon, uarangko chu•sokatna man•jaengani gimin gipin cholrangni bidingo chanchirimaniko dakna gita, Bristibar salo, Nokrek Biosphere Reserve-ni ja•reko donggipa songrangni Nokmarangko grongna re•angaha.
Ua, Principal Secretary Sampath Kumar, Forest and Environment Department-ni official-rang, Meghalaya Basin Development Authority (MBDA) aro Nokma Council-ni dongpaanio, Sakalgre, Baladinggre aro Sakal Aduma songgittamona re•angaha aro konta 6 mangni gita, Ganol chibisik jolrangni gimin Nokmarang baksa agangrikangaha. Ganol chiring, Nokrek bisikoni jokbagipa chiring ong•a jean, Tura songjinma aro gipin jolrango songdongenggipa manderangni ringna jakkalenggipa chi ba ong•achim.
Nokrek ja•reko donggipa song jean Me•mang Narang bang•beanina mingsingbeako man•gipa Sakal Aduma songni Nokma baksa, buring bolgrimrangko ripinganio man•enggipa neng•nikanirangko aro uarangko namdapatani gipin ja•kurangni gimin chanchirimaniko dakangaha.
Chiring chibisikrangko naljoke ripinge rakkina aro uarangko gital ong•atpiltaina miksonge sorkarini gital de•enggipa dingtang dingtang ja•kurangni giminba ua songni Nokmarangna talate on•angan baksa, Green Meghalaya Initiative aro Payment for Ecosystem Services (PES) Program, je program-ni ning•on, buring bolgrimrangko ripingenggipa songrangna, Hectare prako gong hajal 15,000 tangkarangko boksis on•aniko dakgen ine janapataha.
Skotong Minister, ia sorkarini de•enggipa ja•kurango songni manderangkoba jak on•pachina ine didiatan baksa, songni manderangna aro sorkari dolgninan namgniko man•a gita, saksa sakgipin baksa nangarangko agangrikani aro bakrimna nangchongmotani gimin talate on•angaha.
A•ba o•e cha•ani bidingo janapengon, Skotong Minister, a•ba o•e cha•anichi buring bolgrimrang cham•roroangenganiko nikna man•engaha aro sorkari bol ge•dapani gimin aro bolrangko ripingani gimin pilak songrang baksa aro dolrang baksa chanchirimanikoba dakengaha ine aganaha. Ua an•sengbaljokgipa aro namgipa janggi tanganiko tangna gita bang•a program-rangko, sorkari a•bachengataha aro Forest, Agriculture, Horticulture aro Soil and Water Conservation Department-rang, ong•telaigipa gamrangko ripinganio apsan ku•monge kamrangko ka•enga ine agan baksa, buring bolgrimrangko ripingna aro naljoke rakkianio bakrimpachina aro sorkarina dakchakaniko on•china pilak Nokmarangko mol•molatjolaha.
Nokrek-o aro uni sepangjolo donggipa jolrango Tourism-ko tang•doatani bidingo janapengon, batanggimin bilsi 2-3 ni gisepo, Nokrek-o tourism-ko tang•doatanio chu•sokna man•aha aro ua jolrangko rongtal an•tale rakkiaiara nangchongmotgipa ong•a aro apsan daken biap nina re•bagiparangkoba jabol galjachina didina nangskaa, maina ia biapni nitoaniko ripingna nanga ine aganangaha.
Na·simang ia video-koba nina man·gen:
Na·simang iakoba poraina man·gen: Bangladesh-ni MP-ko kolkatao so•ota, be•enrangko den•tontonge gala
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
