Nongpoh, Jan 4: Nongpoh Greater Water Supply Scheme-ni ning•o gong crore 103.71 tangkarangko chamgipa Jal Jeevan Mission-na Budbar salo, Meghalaya a•dokni PHE Minister Renikton L Tongkhar-ni jakchi pangchakaniko songe on•angaha.
Ia Jal Jeevan Mission-ko Nongpoh Census Town-ni ning•o donggipa dam 20 songrangna ra•gatengachim.
Pangchakaniko songe on•angani somoio a•dokni PHE Minister, tom•anio bak ra•giparangna aganprakengon, gong crore 103-ni JJM scheme-ko ia dam 20 songrangna ra•gate on•aniara ia songrango donggipa manderangni indita bilsirangna nikenggipa jumangko chu•sokatani gita ong•gnok ine parakangaha.
Ia jolo songdongenggipa manderangna ia scheme-ko ra•gate on•engani gimin ua dingtangmancha Nongpoh-ni MLA Mayralborn Syiem aro PHE department-ni officer-rangkoba mittelpilangaha.
