Shillong, March 30: Ma·mongni Minister of State for Home, Pa Ajay Kumar Mishra, Shilong songjimaona re·baenba Bristibar salo, North Eastern Police Academy (NEPA)-ni chang 51-gipa passing out parade-o bakko ra·angaha.
Academy-oni chu·sokanggipa police officerrangna an·tangni kusinirangko chapatenba, India a·songo cyber security-ni gita dingtang dingtang chagrongenggipa neng·nikanirangko janapenba sorkarini dingtang dingtang dakgipa ja·kurangko de·e kamrangko ka·atengani gimin agananga baksana, da·ororo cyber-ni gita manderangni chagrongenggipa jajrenganirangko Indian Computer Emergency Response Team (CERT-In), manderangna gong·raken mikrakataniko on·an baksa agan-ku·pattianirangkoba on·e kamko ka·atenga ine Pa Mishra tom·ao aganprakangaha.
Dingtang dingtang skie ra·anirangko dake chu·sokanggipa police officerrang, salgro-salaram jolgimikoni sak 189 mang gnang, jemangan re·anggipa bilsi April jaoni a·bachengatgipa chang 51-gipa Basic Course-ko dake matchotangaha ine official saksa koborna parakataha.
Skie ra·anirangko dakdapgipa gimik sak 189 officer-rangoni, sak 25 -de Nagaland-ni Deputy Superintendents of Police-rang, Tripura-oni sak 2 DSP, Arunachal Pradesh-oni sak 8 DSP, Tripura-oni sak 15 DSP aro sak 164 Sub-Inspector-rang, Arunachal-ni sak 1 SI, Assam-ni sak 94 SI, (APRO Communication)-ni sak 69 SI-rang ong·a, aro iamangoni sak 12-de me·chik officerrang ong·achim.
Chu·gimik ja chi·sana kingking skie ra·anirango, police science, legal studies aro social science-ni gimin uamangna skie on·angan baksa, a·palo pilak dakna nanggipa kamrangni giminba uamangna skie on·angjolaha aro gure gadona, chi jrona, skanggipa sana-bananiko on·chengani, aro gari chalaiani giminba uamang skie ra·anirangko dakangaha ineba official parakataha.
