Shillong, Feb 23: Meghalaya BJP dolni ku·wattimgipa Mariahom Kharkrang, Bristibar salo, West Bengal a·doko sorkarini jako ra·gipa primary school-rangna SCC-ni gita mande rim·anio cha·bokani mamlao pattoko donako man·enggipa TMC-ni MLA Manik Bhattacharya-ni da·alona kingking jamin man·kujaenganiko janapangenba, Meghalaya TMC dolni a·dokni manderangna tol·e ku·rachakenggipani kosako matnange aganangaha.
Meghalaya TMC-ko matnangangkuengon, Pa Kharkrang, a·dokoni lak 3 chadamberangna kam on·na gita ku·rachakenggipa aro chadamberangna dingtang dingtang cholrangko on·na dal·dale ku·rachakaniko dakenggipa West Bengal-ni political doloni MLA, skulna skigiparangko aro gipin staff-rangko rim·anio cha·bokenba da·alo sastiko man·enga ine aganenba, iakon TMC-ni chadamberangna kam on·na gita tarigimin mongsonggipa program ong·a ine aganna man·gen aro iandakgipako Meghalaya-o nangnikgenma? ine ua, Bristibar salo press conference ong·atgipao sing·doangaha.
TMC-ni bil-sasonko jako ra·enggipa a·doko cha·bokanirang batroroenganiko aganangengon, ia apsandakgipa cha·bokani kamrangkon Meghalaya gita dakgipa a·dokona uamang (TMC) ra·bana gita nangnikenga ine Kharkrang janapatan baksa, batanggimin somoio Meghalaya sorkariko bilsi-chet-na jako ra·engmitingo chadamberangna kamrangko ong·katatana gita kam ka·gijagipa apsan dilgiparangan da·alo TMC-niba dilgipa ong·enga, uandaken re·baenggipa bilsi-bongana Meghalaya-ni manderangko cha·boktaina gita uamang jotton ka·enga ineba ua agandapataha.
North Shillong-oni BJP dolni candidate ong·e susansienggipa Kharkrang, apsandake National People’s Party-koba matnange aganangengon, NPP sorkarini ning·o, sorkari kamna mande rim·anio kakketgijanirang gnang jeni a·selan bang·a chadamberang nambata janggi tanganiko tangna gita a·dokni a·palrangchina ong·katange kamrangko sanditokenga ineba ua a·kangataha.