Shillong, June 3: Drae til•eka ine North Tura-ni MLA Thomas A Sangma-ko matnangenggipani bidingo sorkari jakgitele am•sandina on•aigen aro pilaknan niamde apsan ong•aiani gimin am•sandianio pangchake uni kosakoba apsan ja•kukon de•anggen ine Bristibar salo, Meghalaya a•dokni Chief Minister Conrad K Sangma parakataha.
Me•chik saksako bia ka•na ku•mikchetenba baditaba chang drae til•eka ine North Tura-ni MLA Thomas A Sangma-ni kosako FIR ka•doangahachim ine nikna man•a.
Indake ong•engon, Sangma-ni kosako FIR ka•aniara kakketan ong•a ine Chief Minister parakatenba, ia a•selara MLA an•tangni gitasa ong•ahani gimin ia a•selni bidingo sorkarini gita aganpana kraani ong•ja ine talatangaha.
“Oe beben ia MLA-ni kosako FIR-ko ka•aha indiba ian ua an•tangni gitasa ia kamko ka•ahani gimin sorkarini gita ia a•selni bidingo agananikode anga krae nikja. Niamde pilaknan apsan ong•a aro chinga sorkarini gitaba ia a•selni bidingo kakketko ma•sina am•sandianirangko dakchina nangnika. Ia a•selni bidingo am•sandianirangko dakanio maming champengani dongjachina chinga cholko on•gen,” ine Chief Minister parakataha.
