Shillong, Dec 19: “Meghalaya a·dokni Congress dolni gimin aganode, uamang chu·gimik jaja-jiji ong·enga aro namen bilding-bildang ong·aniko mesokenga. Uni giminsa a·dokni manderangni namgnina dangdike on·na sikmanchaa ong·ode Indian National Congress-o dongana bate, Trinamool Congress dolo bakrimna ian uamangna namchachagipa somoi ong·enga aro uamango donga pilak daitorangko chu·sokatna iasan uamangna pangchakaniba ong·enga ine AITC, Parliamentary Meghalaya-ni skotong dilgipa Dr Mukul Sangma parakataha.
Da·omiting Meghalaya a·dokko NPP aro BJP dolgni bakrime rikenggipa sorkarina Congress Legislature Party-ni chakpaenganiko parakatani gimin niatgenchimode, ian a·dokni manderangko chu·gimik togia gitasa ong·aha aro Indian National Congress-ni pangna kamko ka·baaonide namen bikpilskaa ine aganatan baksa, ian uamangni bil-sasono dongkamna ka·oksianikoba mesokenga ine Pa Sangma aganangkuaha.
Batanggimin 2018 bilsini March jao eleksinni result-rangko parakatani ja·man, uamangoni mitamde sorkari baksa bakrimnaba jotton ka·ahachim. Da·o indakgipa obostaona sokaniara ian uamangni gisiko sikbeaniko chu·sokatani ong·a ine anga chanchimana. Chinga gimik sak 12 MLA-rang Novemver 25 tariko AITC-o bakrimeaha aro ia bang·gija salrangni gisepon uamang, batanggimin 2018 bilsio a·dokni manderangna ku·rachakatango dongangkuna man·tokjaha ineba Dr Mukul Sangma agandapataha.
