Shillong, Mar 18: Meghalaya a•doko NPP dolrang chingni chakpaaniko nangnikjaoba aro uamang chingko opposition dol ong•china agangenchimoba chingo maming neng•nikani dongjawa ine Pynthorbah ni MLA AL Hek aganaha. ” Chinga NPPchi dilenggipa MDA sorkari baksa bakrime kam ka•anioni da•alonaba ong•katgijaan kam ka•enga. Bebe gita NPP dol chingko rikale galoba ba uamangna chakpaaniko nangnikjae agangenchimoba chingna maming neng•nikani dongjawa” ine Hub news baksa agangrikanio aganaha. Manipur a•dok sorkari rikani gimin aganengon, Manipur BJP dilgipani Delhiona bilange skotong ministerni biapna golpobaaha aro NPP dilgipa aro Meghalayani skotong minister Dr. Conrad Sangmaba Manipurona re•ange BJP baksa bakrimpana grongaha aro kobor man•ani gitade BJP dolrang darang partyni chakpaaniko namgnikgija dolsachin sorkariko riknaba gnang. Uni gimin BJP uamangko okamode uamang baksa bakrimpagen aro uamang okamjaoba pilak obostarangko nigrike kamrangko ka•anggen ine Sangma aganaha.
“BJP aro NPP Meghalaya a•doko maming neng•nikani grian kam ka•enga, indiba skotong minister obostarangko nigrike kam ka•gen ine agangenchimode chingaba uana nisenge jekoba chanchigen” ine Hek agandapaha.
“Chinga a•dokna dangdike on•angna aro NPP baksa bakrime kam ka•na maming neng•nikani dongja, NPP ni padot ni agananio aro uni chanchidilanio pangchake chingaba nigrike kamrangko ka•gen” ine Hek agandapaha.
