Shillong, Nov 5: Bye-election-o chegipa MLA sakgittam-ni Meghalaya Legislative Assembly-o ku•mikchetani ja•man, Rajabala constituency-ni gital MLA Md Abdus Saleh aro Mawryngkneng constituency-ni MLA Pyniaid Sing Syiem-na Shillong songjinmao donggipa NPP office-o dingtangmancha mande ra•pilskaaniko dakangaha.
NPP-ni gital MLA sakgnina mande ra•pilskaaniko dakanio NPP-ni national president aro Meghalaya a•dokni Chief Minister Conrad K Sangma baksana a•dokni Deputy Chief Minister Prestone Tynsong, Rajya Sabha MP WR Kharlukhi aro Cabinet Minister Dasakhiatbha Lamare-ba dongpae bak ra•angaha.
Ia tom•anio NPP-ni national president Conrad K Sangma jinmana aganprakangengon, skanggipa Nokgipa Isolni pattianirangna mittelpilangenba, by-election-o rakbee kamrangko ka•ahani gimin NPP-ni dilgiparangko, NPP-na kam ka•enggiparangko, MDA-o bakrimenggipa dolrangko, ripengskarangko aro chegipa candidate-rangni nokdangrangko mittelpilangaha.
NPP-ni kosako opposition dolrang tol•e sakkirangko on•na jotton ka•ahaoba manderang, uamangni tol•pinapanirangko ma•sie sorkarina pu•onaha aro ian manderangni sorkarini kamo kusi ong•enganiko mesokani ong•a ineba Sangma aganaha.
Congress dolni bilakgipa constituency damgnio skanggipa changna cheaniara altua ong•jachim ineba ua aganaha.
A•dokni manderangna kamko ka•anio pangnan bamgipa ong•china aro a•dokna dangdike on•anio rakbate kamrangko ka•china gitaba ua NPP-ni dilgiparangko didiangaha.
Ia tom•anio Mawryngkneng aro Rajabala-ni gital MLA sakgniba jinmana aganprakangengon, ia bye-election-o uamangko chegipa ong•atna rakbee kamrangko ka•ahani gimin NPP-ni national president-ko aro NPP-ni gipin dilgiparangko mittelpilangaha.
