Shillong, Oct 4: Shillong-o donggipa National People’s Party-ni office nok a·palo gopretgnigipa Improvised explosive Device (IED) bomko donani gimin champengata man·gipa Hynniewtrep National Liberation Council (HNLC) bobil dolni kosako Meghalay police Sombar salo mamlako segatangaha.
Ia obostani bidingo Assistant Inspector General of Police (A) Pa GK Iangrai-ni koborna u·iatani gitade, Lachumiere-o donggipa NPP office mikkango attam 3 atamango ma·sina man·gijagipa manderang tangsim bag-ko gale donangaha.
Koborko man·a tapan a·dokni bomb detection and disposal squad (BDDS) dol aroba a·jani police officialrang biapona sokbae sandie nianiko dakataha. Indake ua gale donanggipa bag ning·aoniko gopretkugijagipa improvised device-ko man·aha aro BDDS team joljolan ua bostuko nisiate galaha,” ine Pa Iangrai talataha.
Indake, NPP offcice mikkango gopretgnigipa bostuko donaniko HNLC bobil dolni social media gita a·kangatani gimin dolni kosako Laitumkhrah police station-o kragipa niamrango pangchake mamlako segatangaha ineba AIGP koborna taldapataha.
