Shillong, Oct 26: Meghalaya a•doko tangka paisani gita jakkalsretanirang aro maming namroro silroroanirang dongjaenga ine dingtang dingtang dolrang matnangtokengon, NPP-chi dilenggipa MDA sorkari bang•en namroro silroroani kamrangko a•dokna ra•baaha ine Mongolbar salo NPP-ni dilgipa aro a•dokni Cabinet Minister James PK Sangma a•kangatskaaha.
Meghalaya a•dokni damgittam Assembly constituency-ni bye-election-na NPP, ia damgittam constituency-rangon rakbee kamrangko ka•enga aro ia damgittam constituency-rangon NPP chegen ineba Sangma, an•tangni ka•dongsoenganiko parakataha.
Meghalaya a•doko niam gri koela badinganina, niam gri coke karkanarangko kulienganina, power department-o chu•sokgijanirangna aro uandakgipa dingtang dingtang kamrangna NPP-chi dilenggipa MDA sorkariko dingtang dingtang dolrang matnangtokengachim ine nikna man•a.
Indake ong•engon, NPP-ko chu•sokgipa ong•ja ine matnanganirangko Sangma jegalatskaenba, ia sorkari a•dokna dingtang dingtang namroro silroroani kamrangko ra•bana man•aha ine parakataha.
NPP-ni kamrangko nike manderang, NPP-o ka•donganiko mesokangkugen ineba ua an•tangni ka•dongchakenganiko parakataha.
