Tura, Nov 5: National People’s Youth Front-ni State Working President Te Dabo M Marak, West Garo Hills NPYF-ni President Te Silban R Marak aro dolni gipin chadamberang, West Garo Hills a·jani samtangtango donggipa chiring-chibisik, buring-bolgrimrangko nosto ong·atgijagipa bosturangko ra·chakani ba chipchakaniko Sonibar pringni bako Najing Bazar, Araimile aro Tura Bazar-o manderangna indin suale on·angaha.
Iani bidingo talatangengon, samtangtango donggipa chiring-chibisik aro buring-bolgrimrangna maming nisianiko ra·bajana gita aro songsalna namgniko ra·bana miksonganio ia ra·chakanirangko suale on·aha, aro ia bostuko dingtang dingtang men·dioniko ra·e tariahani gimin iara manderangni an·seng-baljokanina namgniko on·gipaba ong·a. Unbaksana, ia bostuara sal 90 ni ja·manon an·tangarin sojronge bon·angaigipa ba gimaangaigipa ong·a baksana iako a·kol cho·e dapna ba wa·alo so·e galna nangani dongja ine Youth Front-ni dilgiparang agan-talataha.
NPYF-ni gita iako amadipet jaantian songjinmao dokkan dakenggiparangna aro pale-sim·e cha·enggiparangna mikkangchiba indin sualna miksongani gnang ine aganangkuenba, iandakgipako songsalni aro manderangni namgnina a·bachengate on·gipa Meghalaya-ni skotong minister Pa Conrad K Sangma-koba mittelpilangan baksa, Meghalaya a·dokko mikkangchi plastic grigipa, rongtalanian gapgipa aro tangsekgilgil dakgipa a·dok ong·atna gita NPYF-ni dilgiparang sakantinan ku·mongrimanikoba on·angjolaha.
