DIBRUGARH, Dec 1: Assam-ni Dibrugarh aro Tinsukia a•jarango, Assam police-ni Eastern Command Intelligence Battalion (ECIB), aro 18 Garhwal Rifles nangrime sandirikkitenba, bobil dake chakatgipa dolgni, chong•motan People’s Revolutionary Party of Kangleipak (PREPAK)-ni sakgni aro NSCN-KYA-ni saksa baksa jak donggipa manderangko rim•na man•aha.

Kobor ra•timgiparangna parakatani gitade, PREPAK bobil dolni saksako Dibrugarh airport sambaoniko rim•na man•chengaha aro uko sing•sandiani ja•mano apsan dolni sakgipin mandekoba rim•na man•aha. Apsan daken sandirikitgipa sipai dolrang, Dibrugarh-ni Tinsukia Digboi Jagun aro Jairampur rama gita Myanmar-china re•angenggipa NSCN-KYA-ni mande saksakoba Tinsukia a•jani Jagun songoniko rim•na man•aha.

Rim•ako man•gipa manderangara, bilsi 29 ong•gipa Marmet Ngaimong, bilsi 38 ong•gipa Nongthombam Kabichandram Singh aro bilsi 23 ong•gipa Pebam Akash Singh ong•achim ine ma•sina man•aha.

Rim•ako man•gipa PREPAK bobil dolni manderangara, Nongthombam Kabichandram Singh aro Pebam Akash Singh ong•a aro uamangara Manipur a•dokni Imphal East aro Imphal West a•jarango songdonggiparang ong•achim ineba ma•sina man•aha.

Rim•ako man•gipa sakgipin Marmet Ngaimong-ara, NSCN-KYA bobil dolni chairman Yung Aung-ni jonggipa ong•a ine ma•sina man•skaaha.

U•iatgiparangni parakatani gitade, uan adatang Yung Aung-ni ge•etanirangko ja•rike kamrangko ka•enggipa ong•achim.

Iakoba poraie nina man·gen: Manipur-ni Ukhrul-o donggipa PNB-oniko crore 18.85 tangkarangko ra•sekanga