Guwahati, May 28: Assam a·doko dal·batsranggipa karkana Numaligarh Refinery Limited (NRL)-o 26 percent-ko Assam sorkari chapataha.
Assam a·dokni Chief Minister Himanta Biswa Sarma-ni parakatani gitade, 2020-21 bilsini budget-o ua Finance minister ong·e ia karkanao tangka chapaniko bariatna tik ka·enba, gong kror 1400 tangkarangko chame donataha.
Numaligarh Refinery, jekon ‘Accord Refinery’ ineba mingachim, Assam-o chalaienggipa dambri karkanarangoni dal·batgipa karkana ong·enga aro ia karkanako Assam Accord-ni Clause 7-o pangchake kuliahachim.
A·bachengode Assam sorkari, ia karkanao 12.35 percent-kosan chapahachim indiba da·o 26 percent-ona bariataha.
Ia karkanao tangka paisarangko chapna gita Assam sorkari, Oil India Limited (OIL)-koba rimnapaha aro uandaken re·anggipa bilsini March jao OIL, India sorkarini pal gong kror 2187-ko aro Assam sorkari gong kror 500-ko Numaligarh Refinery-na gamaha. Bristibar saloba Assam sorkari, gong kror 500 tangkarangko ia karkanana gamdaptaiaha.
