Shillong, June 9: Me·chikrang aro bi·sarangni kosako ong·gija kamko ka·anio obostako chagronggipa manderangko krat-cha·atani aro uamangko jaksi otanirang ba uamangni gimin talate seanirangko aro sakgipinnni seatgiparango comment ka·anirangko dakjachina gita Meghalaya a·dokni police, Butbar salo pilak songdongenggipa manderangko aro internet jakkalenggiparangko mol·molataha.

Dongimin niamko pe·anirangko jeba mande ba group administrator-rangko rim·a man·ode niamni dingtang dingtang kragipa section-rango pangchake rakgipa sastiko on·gen ineba Assistant Inspector General of Police (A) Gabriel K Iangrai, Butbar salo seachi sakantina mikrakataniko on·aha.

Uni aganani gita, me·chik aro bi·sarangko ong·gija dakanio obostako chagronggipa manderangko krat-cha·atanirang, jaksi otanirang, noksa aro video-rangko internet-o skatang watdoate giproroatanirang, sakgipinni seatgipao comment ka·anirangko bang·a social media-ko jakkalenggipa manderangoniko niksoenga ineba ua parakataha.

Whatsapp group-rangko man·chape, bang·a social media group-rangon iandakgipa obostako chagrongenggipa manderangni gimin saksa-sakgipinna u·iatgrikaniko dake giproroatanirang ong·enga jean niamni kosako ong·a.