Shillong, May 11: Sajinmani batrikrikani gimin Meghalaya sorkarini a·doko lockdown-ko ra·gatatanichi dondipatchenggipa HSSLC porikkani bangki subject-rangko seatna somoirang namangaha ine u·iani ja·manosa porikkarangko ra·angtaigen ine a·dokni Education Minister Pa Lahkmen Rymbui talataha.
Mamlani bidingo aganengon, porikkarangko serikna man·gijagipa sak 200 mang high risk contact-o ong·giparangni giminba sokari chanchina nanggen ine Education Minister Pa Lahkmen Rymbui agankuaha.
“Chinga uamangni giminba chanchina nanggen aro jensomoio obostarang namangaha ine nikon nanga gita u·iatanirangkoba on·anggen,” ine Pa Rymbui agandapaha.
Giproroenggipa sabisini a·sel namen neng·nikaniko chagrongenggipa skie ra·ani a·bana mikkangchi maidakgipa ja·kurangko de·anggen ine sing·anina, manderang sabisini tikako su·tokna nanggen aro dongimin niamrang chong·motan Standard Operating Procedure (SOPs)ko namedake ja·rikna nanggen ine aganaha.
Bilsi chu·onggipa manderang sajinmani tikarangko su·angna nanggen ine aganenba, da·odipet bang·a manderangan tikarangko su·na gisiko nangtokjaenga ineba minister, skigiparangko tika su·angani gimin sing·anina aganchakaha.
Indakeba janapjolna man·gen, je giproroenggipa sabisini a·sel bi·sarangni poraianirang ja·donggaatako man·eming poraienggipa chatro-chatrirang aro skigiparang namen namjabatgipa neng·nikanirangko chagrongna gita nangaha.
Iani gisepon, Meghalaya a·doko online gita klasrangko ra·anioba internet-ni namsrangjani a·selan namen dal·bea ra·bianiko chagrongenga ine bang·a chatrorang aro skigiparang an·tangtangni suk ong·gijanirangkoba parakangtokaha.
