Shillong, July 22: Adita salrangna skang obosta ong·anggipani mamla namen chanchina nanggipa ong·enganio, adita sak manderangchi drae til·ekako man·gipa dambe me·chik bi·sana sana-bananiko on·na gita obosta ong·gipa biap a·jatangni ning·o ga·akjani gimin sanna jechakgipa doctor-ni kosako raka ja·kuko de·atna gita Meghalaya a·dokni Social Welfare department ning·tue chanchibewalenga ine officialrang Butbar salo u·iataha.
Obosta ong·gipa song Nongalbibra-oni km 22 mangsan chel·aiani gimin police, ua me·chik bi·sako East Garo Hills a·jani Williamnagar Civil Hospital-ona ra·baahachim, indake ong·oba uanoni doctor a·ja dingtangani gimin neng·nikanirangko janape gimik km 75 mang chel·gipa South Garo Hills-ni Baghmara Civil Hospital-china watatskaaha.
Indake ong·engon, South Garo Hills a·jani ning·o ga·akgipa Nongalbibra songo mija Robibar attamo mombati brena ong·katangmitingo bilsi dambeko kragija drae til·ek-an·chagipa sakbri denggurangkoba police rim·aha.
Ia obostako raken jegalatengon, ia ong·anga obostani gimin chu·gimik talbate ra·china gita daitoko ra·gipa officialrangko aganataha ine Social Welfare Minister Pa Kyrmen Shylla u·iataha.
“Sana-bananirangko on·anio, a·ja dingtang ong·anichi mamingo champengani dongja. Chinga ua doctor-ni gimin Health Department baksa agangrikanggen aro dos dakgiparangkoba police rim·aha jemangan rakbatgipa sastirangko man·na krachongmota, ineba minister aganataha.
Unomiting, a·dokni dingtang dingtang organisation-rang jekai Garo Students’ Union (GSU) aro Federation of Khasi Jaintia and Garo People (FKJGP), bilsi 14-san ong·kuenggipa me·chik dambeko jinma til·ekrimaniko jegalatan baksa Williamnagar Civil Hospital-o dangdike on·enggipa doctor-ni gisik griani kamkoba raken jegalataha aro uni kosako sastiko on·chinaba uamang dabiangjolaha.
Unbaksana, Congress-ni MLA aro ACWE-ni chairperson Ma Ampareen Lyngdoh-ba maini a·selo Williamnagar Civil Hospital-o una sana-bananiko on·na gita jechakahachim uni chu·gimikko panel-chi sandirikkitatgen ine agananga baksana, sajinmachi sinjetako man·mitingo indakgipa obosta ong·ani giminba ua an·tangni suk ong·gijaniko parakatjolaha.
Indake, ia ong·anggipa obostani bidingo chu·gimik talataniko on·china gita Williamnagar Covil Hospital-ni Medical Superintendent-ko ge·etataha ine East Garo Hills a·jani District Deputy Commissioner Pa Swapnil Tembe u·iatangaha.
