Tura, Oct 27: Re•baenggipa October-ni 30 tariko ong•atenggipa Meghalaya a•dokni damgittam Assembly constituency-ni bye-election-na bilakbee campaign ka•anirang Budbar attamchibara matchotangaha.
Ia bon•kamgipa salo, Meghalaya a•dokni Chief Minister aro NPP-ni national president Conrad K Sangma, NPP-ni dingtang dingtang MLA aro MDC-rang baksa Rajabala constituency-ni Bhaitbari songo jinma tom•bimonganiko ong•atangenba, NPP-ni bilko mesokangaha.
Ia tom•anio NPP-ni dingtang dingtang dilgiparang, jolo songdongenggipa manderangna aganpraktokengon, dingtang dingtang political dolrangni aro mongsongbate Congress dolni tol•e ku•mikchetanirangna aro Rajabala-ni manderangko dilsrete campaign-ko ka•ahani gimin matnange aganangtokaha.
Ia tom•anio gitcham MDC Sofiur Rehman aro NCP-ni state president Saleng Sangma-ba aganprakangengon, Congress dolko matnange, ia bye-election-o NPP-ni candidate-kosa seokchina gita Rajabala constituency-ni manderangko didiangaha.
Ia tom•anio jolo git ring•rakgipa manderangba dongpae gitrangko ring•e mesokangaha aro manderangko an•saoatangaha.
Ia tom•anio NPP-ni candidate Abdus Saleh-ba jinmana aganprakengon, ia bye-election-na Rajabala constituency-ni a•bri aro a•kawe jolrango NPP-ni candidate-na bilakbee campaign-ko ka•ahani gimin NPP-ni pilak MLA-rangko aro MDC-rangkoba mittelpilangskaaha. Ia bye-election-o uni cheaniara Conrad Sangma-ni cheanian ong•gen aro manderang ia bye-election-o NPP-nan pu•ontokgen ineba Saleh, an•tangni ka•dongchakenganiko parakangaha.
