Guwahati, Aug 12: Tokyo songjinmao ong•atanggipa Olympics-o Boxing kal•susae bronze medal-ko chegipa Lovlina Borgohain, Bristibar pring 9:20 bajimango Guwahati songjinmani LGBI Airport-ona sokbaaha aro uni Guwahati-ona sokbaani somoio uko Assam-ni chief minister Himanta Biswa Sarma aro gipin dilgiparang rimchaksoaha.
Olympics kal•susaanirango uan Assamese-rangoni skanggipa medal-ko man•chenggipaba ong•ahachim aro uandaken uni Assam a•dokona sokbapilanio uko Assam a•dokni manderang Bihu chrok mesaanirangchi aro gitrangko ring•e rimchaksoaha.
Guwahati airport-ona sokbaani ja•man Lovlina Borgohain, kobor ra•timgiparang baksa agangrikengon, uni kal•susaanirango una chakpaanirangko on•ahani gimin ua Assam a•dokni manderangko mittelpilangaha.
“Angni kal•susaanirango angna chakpaanirangko on•ahani gimin anga Assam-ni manderangko mittelpilna ska. India a•songna medal-ko cheahani gimin anga namen kusi ong•a indiba gold medal-ko chena man•jahani gimin anga suk ong•ja,” ine Lovlina aganaha.
Assam a•dokni Chief Minister Himanta Biswa Sarma-ba social media-o Lovlina Borgohain-ko mittelpile seataha.
“Mikkim rasong baksa anga Olympics-o medal-ko chebagipa Lovlina Borgohain-ko Guwahati airport-o rimchaksoaha. Tokyo Olympics 2020-o chu•sokgipa ong•anichi ua an•tangni jumangko chu•sokatasan ong•aigija songadam nokadamrango kal•susaanio gisik nanggipa chadamberangnaba dakmesokaniko on•angaha,” ine Sarma parakataha.
Lovlina Borgohain-ko LGBI airport-o rimchaksoe program-ko ong•atanio All Assam Students Union, Asam Jatiyatabadi Yuba Chatra Parishad aro uandakgipa dingtang dingtang dolni membor-rangba dongpae bak ra•angaha.
Lovlina-ko uni songtang Golaghat a•jaona salangna gita Assam State Transport Corporation (ASTC)-ni gita dingtangmancha bus gariko donsoaha aro ia bus garini a•palo ‘Na•an India a•songni Mikkim Rasong ong•a’ ine seaha.
