By Steffi Sangma
Daororoni ni kobor rangko kna∙on, bijoli ba Power Department ni bidingo matnange aganako an∙ching bange niknagita manenga. Reanggipa sal somoi rango A∙dok gimiko bijoli sianichi pilakan nengnikaniko chagrongaha. Indiba name mancha niate nigenchimode, ia bijoli siani ba load shedding ara gital gipa obosta ong∙ja ine nikna man∙a. Skangrangoba an∙chingni a∙doko load shedding rang ong∙rongbea, maina NEEPCO aro gipin bijoli sualgiparangna MeECL banga bilsi rangna gro ko chotna man∙jaha. Apsan daken daoni Sorkari ba ia obostarangko chagrongenga.
Ia obosta rangko uieba, reanggipa sal somoi-o Pa Jemino Mawthoh, jean UDP ni General Secretary, an∙ching dilgipa Pa James K. Sangma ko matnange, Power Minister ni gadangoniko ra∙galna nanga ine aganangaha. UDP gesa MDA sorkari-ni bak-o ongeba indake matnanganirangko ka∙ani ong∙ama? UDP party ni gipin dilgiparangni aganako kna∙genchimode, Party President Pa Metbah Lyngdoh aro Home Minister Pa Lakhmen Rymbui iani bidingo maming uiatani gri ba kobor man∙soja ine agantaia. Indake katta meligija agananira, uan an∙tang MLA chegijani ba mikbuanisa ong∙a ine nikna man∙a.
Reanggipa bilsio Pa James Sangma ko niam pe∙e koila watna cholko on∙a ine matnange, Home Minister ni gadangoniko ra∙galakoba nikna man∙aha. Home portfolio ko UDP ni dilgipa Pa Lakhmen Rymbui jakko ra∙o mangba niam gri koila watako nikna man∙kuaia. Apsan daken daoba antangtangni party (UDP) ni manderang Power Minister ni gadangko man∙rikna ine kam ka∙achim ineba chanchichipna man∙aijok. Cabinet-o A∙chik Minister rang sakgni mangmang ong∙e UDP rang antangtangna chokki ra∙sekna miksongani donga ine nikna man∙a.
Name dake niatgenchimode, anching a∙dok-o bijoli ni nengnikani mangmangko cha∙gronga ong∙ja. Gipin nengnikanirang ba gnang, jekai Education Department-o ka∙giparangni dormaha man∙gijani aro banga teacher rang MTET pass kagijanichi kam ra∙gala man∙aha. Health Department ni bidingo niatgenchimoba, an∙ching banga obosta rangko nikna man∙a. CAG report o janapgimin gita, reanggipa bilsi-7 ba bilsi-8 na MBBS pass ka∙bagiparangkoba hospital rangona kam suale ba tik ka∙aniko chu∙sokatjaha. Aro dingtang dingtang ko∙na noksik rangona PHC ba gipin san∙ani chol rang namen komia ine nikna man∙a.
Indakgipa obosta rang donggenchimoba, iarangni bidingode Education Minister aro Health Minister ba gipin kam rangko jakko ra∙giparangko maming matnangani ba agandapaniko knaman∙ja. A∙dokko department gesa mang mangko jaksi ote matnange agananira ongama? Kam namgijako niatode an∙ching Education Minister koba resign ka∙na aganani ong∙achim, maina banga teacher rang daona kingkingba dormaha man∙gija janggi tangna nangenga.
Banga nengnikanirangko pin∙dapile gesa department mangmangko dilgiparangni aro Opposition party ni matnange agananira ong∙ama? Ma teacher rangni dormaha man∙gijakode nikatja? Skul nok donggijarangkode gualjokma? Rama jalang namgijakode nikatjajokma? Resign ka∙na aganode apsan daken Khasi Minister rangkoba jean kam name ka∙gijagipakode aganani ong∙a. UDP ni antangtang party ko public na nama ine mesokna challaki dakaniba ongnaba gnang ba GHADC election sepangbaana public na nampi∙neke mesokani bu∙ti ba ongnaba gnang!
(The views expressed in the article is of the author. [email protected])
