By Norah Sangma
GHADC ni bidingo an•ching niate nion bang•a neng•nikarangko nikna man•enga. Ia jamela rangara ru•uta bilsirangoni chimonggipa obosta rangni a•sel ong•aha. Councilo niam gita jean service rule rango pangchake kam na rakkijani a•seloni a•bachengbaha ine nikna man•a. Indita bilsina jean bil o ong•anggiparangni an•tangtang mande ko kam ona napatani gimin ba ong•aha. Indake niam gri kam na rakkianiko adita bilsirangna dontonggija ka•angaha.
Agane niode, nokdangko alduna gita pagipao bi•sa sak 5 ni gitasan bil dongaigenchimode, una sak 5 ko rimnapdapode, indide ua maikai bi•sa sak 10 ko subita ong•e alduna man•gen!. Apsandaken an•chingni Counciloba indakgipa obostarang ong•enga maina dilgiparangni aganako knae nion, Council ni ja prako tangka paisa man•ara crore 2 rangni gitasa ong•aia indiba kam ka•giparangna ja prako on•na nanganiara crore 4 rangni gita ong•skaa.
Beben indita bilsi na dormaha on•na man•gijaniara re•anggipa dilgiparangni dal•begipa gualani aro dilna changjani a•selan ong•aha. Ia obosta rangni a•selan, an•ching ia bilsi ni GHADC election o gitalgipa dilgiparangni che•aniko bang•en nikna man•aha. Ian public ni dilgipa gital rangko nangnike seokani ong•a. Public ni kosako nangana batpile dilgiparang ka•draon maming saloba baikamna man•ja.
Dilgipa gital rangko public ni nang•nika gitan man•aba man•bebejokchim indioba da•o EC gital rang office o asonge kam kon ka•chakatna man•kujaenga. NGEA rang baksa meeting tom•anio, ja 5 ni dormahako on•chengna ku•rachakahachim. Apsan daken EC gital, kamrangko ka•na gita somoi ba ja-rangko bi•an baksa, namgipa bite rangko ra•bana man•jagenchimode, NGEA rang an•tangtangni protest ka•anirangko dakangtaibo ineba ku•chakangaha.
Ja 32 ko toate nigenchimode ja 5 ni dormahade namen komibebea maina kamrangko ka•engon an•ching ok-tangko gapatnasa aro nokdangni nanganirangko chusokatnasa kamrangko ka•enga. Indake councilo kam ka•engiparangna uamangni man•na nanganiko ba dormahako on•gijaniko darangan ra•chakna man•jawaha. Indake ong•genchimoba da•o gitalgipa EC rangni mol•molagita ja 5 ni dormaha ko ra•chenge aro ja 2 ni gisepo namgipa ku•pattianiko ra•bana man•ama man•ja ko senge nie aro ia gitalgipa EC na kam ka•na gita somoi ko on•na nangachim maina an•ching gitcham dilgiparangni kamrangko namnikjaenba gital dilgiparangko seokaha uni gimin uamangna kamrangko ka•na gita somoirangko on•e nina nanga. Indake office o napgija protest ka•aioba darang dol nan maming namdapaniko ra•bana man•jawa batesa songdongenggipa sakantinan neng•nikaniko ra•baana agre maming namgipa biteko ra•bajawa.
