Shillong, August 17: Eastern Ri Bhoi Organic Farmer Producer Company Ltd-ni ning•o game cha•gipa manderangna Integrated Processing Unit ba game ge•e man•giminrangko chimonge tarichakram aro Organic Outlet ba palchakram biapko Ri Bhoi a•jani Bhoirymbong songni Khapmara biapo Umroi elekani MLA George B Lyngdoh-ni oprake on•anichi Farmer Producer Company-rangna mingsa dal•bea dakchakaniko ra•baani ong•aha. Ian game cha•gipa manderangni ru•utbea salrangoni nichake dongenggipa salko be•en pil•atani ong•aha.
Game ge•e man•giminrangko tarichake palchakani biapko Mission Organic Value Chain Development for North-eastern region-ni gita on•aha aro iani skanggipa Phase-ko Farmer Producer Company-rangna Horticulture Department-ni ning•o tangka gong lak 35 mang on•aha.
Mission Organic Value Chain Development for North-eastern region, a•jao samrangko jakkalgija ge•a gamaniko dake janggi tangenggipa manderangna ge•e gamanio bang•bate aro nambata biterangko man•na dakchakani, game man•giminrangko chimonge tarichakna aro pala sim•anirangko a•songtangosan ong•aigija a•palchinaba palatanirangko dakna namgipa cholrangko on•anggen.
Skanggipa Phase-o ge•12 Farmer Producer Company-rangko bikotaha jerangan ostrorangko jakkale ge•anirangko dakanggen, game man•giminrangko damsan melie chimonge bang•bate aro nambatako ge•e man•giminrangko palna sim•na bilrangko man•enga.
Ia Farmer Producer Company gita pala sim•anirangko dimong dake bang•e palatna cholrangko man•engaha. Gipin palgipa dol ba bregipa chonchona dolrango pangchakanirang dongjaha.
Mission Organic Value Chain Development for North-eastern region-ni ning•o Farmer Producer Company-rang game ge•e man•giminrangko damsan chimongchakna, dakrongbewalo pangchake tarianirangna aro palna sim•na kadepanirangkoba dakna bil gnang jedakode uamang an•tangtangni ge•giminrangko nama gadango palatna man•gen aro ian da•o dipetde samrangko jakkalgija ge•a gamani ine mesokna bil gnangatgipa ong•a.
Eastern Ri-Bhoi Organic Farmer Producer Company Ltd.-ko India Sorkarini Scheme, Mission Organic Value Chain Development for North Eastern Region (MOVEDNER) Phase-1 ine bikoatchengaha aro Ministry of Corporate Affairs-ni ning•o 26 October, 2017 bilsio register ka•e, registration no. U01100ML2017PTC013648ko man•aha.
Farmer Producer Company-o gimik sak 500 game cha•giparang gnang, jemangan 500 hacter a•arango ge•a gamaniko dakenga aro iani ning•o dam 9 songrang- Nongtarian, Umtung. Madan Nonglakhiat, Bangla (Nongtraw), Lumsohpieng. I umdaitkhla Khapmara. Mynsain, Pynthor aro Umden Umbathiang-ko man•chapa. Samrangko jakkalgija ge•gipa ine bimung minggatako man•atgipara “e•ching” ong•a. Unikoa gipin ge•anirangara holdi, beans, banda kobi, jal•ik, me•rakku aro mi ong•a.
Farmer Producer Company-ko bikotkujamiting sal somoirangode, game cha•giparang, ge•atangtangko songtangni anti cha•ramrangosan palna-sim•na chol ong•aiachim aro songtangni badingchiwalgipa manderangnasan dam komiao palna nangrongaiachim maina uamang gam ge•e man•giminrangkoba chimongchake donna biaprang chu•ongpaja aro badinggiparangni dam komie ra•na tik ka•anirangkoba dingtangatna bil dongpajachim.
