Guwahati, May 19: COVID-19 giproroenganichi oxygen-ko nanganiba batroroengahani gimin Budbar salo Assam-ni chief minister Himanta Biswa Sarma-ni dilanichi Cabinet-ni tom·aniko ong·atangenba, oxygen tarigipa karkanarangna bijoliko indin on·skana tik ka·angaha.
COVID-19 giproroenganichi oxygen-ko nangenggipa manderangna chu·onga gita oxygen-ko on·na man·na gita Assam sorkari, oxygen chipenggipa karkanarangna bijoliko indin on·anggen ine parakataha.
“Assam a·doko oxygen chu·onggijaniko chel·chakna gita Cabinet-ni tom·anio chinga adita niamrangko ra·gatangaha. Assam a·doko gital oxygen karkanako kuligenchimode uandakgipa karkanarangna Assam sorkari bijoliko 100% indin on·gen aro chipe dongimin oxygen karkanarangko kulipiltaigenchimoba chinga uandakgipa karkanarangna bijoliko 100% indin on·gen. Da·o dongenggipa karkanarangko dal·dapatgenchimode gital unit-na chinga bijoliko indin on·gen. A·doko je dongenggipa oxygen plant-rangna chinga bijoliko 20% indin on·skagen,” ine Assam-ni Chief Minister parakataha.
Indake ong·engon, Bodoland Territorial Region, Karbi Anglong aro Dima Hasao Autonomous Council-ni chief executive membor-rangnaba Cabinet-ni gadangko on·na gita Budbar salo Assam sorkari tik ka·angjolaha ine Sarma parakataha.
Ia tom·anio dingtangmancha Debojit Saikai-koba Assam Cabinet, Assam a·dokni gital Advocate General songangjolaha ine u·iataha.
