IMPHAL, Oct 29: Manipur Assembly-ni ge·gittam seat-rangna mikkang ja November 7 tariko By-election-ko ong·atnasiengani gimino National People’s Party (NPP)ni dilgipa aro Meghalaya-ni skotong minister Pa Conrad K. Sangma, Meghalaya a⋅dokni ni Power Minister Pa James K. Sangma baksa Bristibar salo party-ni candidate aro Wangoi Constituency-ni Shri Khuraijam Loken Singh-na campaign-ko ka·angaha.

Tom·ao aganprakanio, Pa Sangma indake aganaha je, watgalgija on·kange kamko ka·gipa, joltangni manderangko galongijagipa aro jenan manderang ka·dongchakna man·achim uandakgipa dilgipako seokchina gita jolni manderangko didienba, indakgipa dilgipana kragipa gunrang Loken Singh-o gnang ine National People’s Party-ni skotong dilgipa agandapaha.

A·jaoni National Party ge·sasangipa ong·anichi, salgro-salaram a·jolrangni dingtang-dingtang neng·nikanirango NPP-an ku·rangko Ma·mongna sokatena man·gen. Manipur-ni neng·nikanikoba party dingtangmancha mongsonggipa ong·e pangnan ra·jringenga ine Pa Sangma ku·chake aganenba, salgro-salaram aro uni manderangni namgnina NPP kamko ka·gen aro an·ching ku·monge kamko ka·achi a·jako tang·doatanina party dakgrikanggen ineba ua aganprakaha.

“Bilsi ritcharangna kingking dongbaenggipa dal·dalgipa National Party-rangba gnang indiba ma·mongo bang·gija seat-rangsan dongaianichi uamangni agenda-an ma·mongni giminsa ong·bataia aro salgro-salaramkode basakobade gualchangaia, unbaksana a·joloni regional party-de National politics-ode bang·gija balrangko chilna man·paia. Uni gimino, Ma·mong sorkari aro Salgro-salaramni gisepo bangbang ong·enggipao NPP-chi kolgapatenga, ine Pa Sangma agandapaha.

Indake ong·engon, Manipur-o songdonggipa manderangni bang·en chakpaaniko nikeming NPP-ni skotong dilgipa ua somaio party-ni memborrangni dongpaanio kusinian suakpile dolna chakpaaniko on·anina mittelpilskaaha aro indake salgro-salaram a·jol gimikna aro apsandake Manipur a·dokni mikkangchi namroro-silroroanina ku·monge kamko ka·angna gitaba ku·rachakjolaha.